الرئيسية > > ايوا ملي خايفين على صورة المغرب علاش أصلا دايرين قوانين كتجرم التشلقيم فالشوارع ، راه 10 دلمليون سائح ماغاداش تجي باش تشوف الكتبية، نسبة كبيرة منهم كتجي تشوف ممتلكات جيهان وحتى بوشعيب
12/10/2014 09:00

ايوا ملي خايفين على صورة المغرب علاش أصلا دايرين قوانين كتجرم التشلقيم فالشوارع ، راه 10 دلمليون سائح ماغاداش تجي باش تشوف الكتبية، نسبة كبيرة منهم كتجي تشوف ممتلكات جيهان وحتى بوشعيب

ايوا ملي  خايفين على صورة المغرب  علاش أصلا دايرين قوانين كتجرم التشلقيم فالشوارع ، راه 10 دلمليون سائح ماغاداش تجي باش تشوف الكتبية، نسبة كبيرة منهم كتجي تشوف ممتلكات جيهان وحتى بوشعيب

محمد سقراط – كَود
العلمانية هي الحل ولكن ( فــ كيليز ماشي فــ بلعكيد)…149100

 

ديما كنت  رافع هاد الشعار وديما كنت كنقول أن المغاربة نهار يعيقو غادي يصوتو على حكومة علمانية، ولكن من بعد القرار الأخير ديال الإفراج على المثلي الإنجليزي واخا راه صدر فحقو حكم، تبدل ليا الفهم وبدا كيبانليا أن حكومة إسلامية لامباوية حسن مية مرة من شي بني علمان عملاء الغرب الكافر، وبدا كيبان ليا واحد الوزير بحال ميشيل فوكو، بقا خاصو غي يخرج فمظاهرة يدافع على حقوق المثليين.
خونا الكاوري كان فالشارع كيشلقم فعشيرو، داز شي بوليسي بانليه داكشي فايت لقياس، لواها معاهم حيث مولف كيلويها مع المغاربة ويصرفق ويشتف وعمر دوا معاه شي حد، حيث لمغاربة معندهم تاواحد فالنكليز لي يدافعليهم على حقوقهم ومعندهمش برلمانيين كيمثلوهم فالبرلمان النكليزي ولي يهددو بمقاطعة المغرب، المغاربة عندهم الله، والله معندوش مع المثليين..

خونا البوليسي دار خدمتو، ودافع على الأخلاق العامة، ووقف حائط صد ضد زعزعة عقيدة المغاربة وميولاتهم الجنسية، وقام بالواجب الله يجازيه بيخير، وسيفط خوتنا يدوزو حدا القضاء، وحيث حنا دولة القانون وكولشي من حقو فمحاكمة عادلة، وطبعا تحكمو روميو وروميو، وبالتساوي، باش نأكدو للعالم أن الجميع سواسية أمام القانون المغربي، ومشاو خوتنا يسبيريو، ولكن مقطعوش النفس.
ولكن خونا نكليزي وفاميلتو وحكومة بلادو مطلعوش ساهلين، طلعو فوق القانون وأقامو الدنيا وأقعدوها من أجل حرية تصرف مواطنهم في أعضائه الخاصة كيما بغا، وناداو كاع بمقاطعة المغرب سياحيا، والمغرب عدنا قاطعو عسكريا قاطعو ديبلوماسيا قاطعو دينيا ماتقاطعوش غي سياحيا، وطبعا مسؤولينا لكبار ناضو كيتجاراو، ودارو التيليفونات، وثم اطلاق سراح الكاوري، واخا راه صدر فحقو حكم قضائي، خرجوه بلا مايتسناو ثورة الملك والشعب باش يعفو عليه سيدنا، أو شي عيد وطني وديني، سيفطوليه عفو سبيسيال من تحت الدف، حيث راه القضية ولات فيها التهديد بمقاطعة المغرب سياحيا.

ايوا ملي لخوت خايفين على صورة المغرب بحال هاكة علاش أصلا دايرين قوانين كتجرم التشلقيم فالشوارع العامة ولي تعرضنا لإحراج دولي بحال هاكة، راه 10 دلمليون سائح ماغاداش تجي كلها باش تشوف الكتبية، راه نسبة كبيرة منهم كتجي باش تشوف ممتلكات جيهان وحتى بوشعيب راه مؤخرة جيهان حتى هي خاص تصارح الدولة راسها وتعتبرها معلمة سياحية، كاين لي كيشد الطيارة من الخليج على ودها، ويشتت عليها لفلوس ويسهر ويعيش ويستمتع ويمشي فرحان، أما تصويرة حدا الكتبية راه مكتدخل على الدولة حتى ريال، الى دار شي كاوري المزيان يقدر يشري شي كلينيكس من عند شي برهوش تما، هادشي الى ماداهش ضرب ليه الخرزة.
النكليزي طلع راجول، وماشي شي واحد نكار الخير، حيث ملي خرجوه خلاو المغربي، ونوض عاوتاني ضجة وخرجو المغربي، حتى هو، إييه عندو الزهر، حيث راه لي بغا يدير اي حاجة تخص حريتو الجنسية، يديرها مع النصارة فهاد البلاد، أما كون طاح مع شي مغريبي، كون راه باقين كيسبيريو هو وياه فالحبيسي،  إيوا آش باقي بغيتو، كاين شي علمانية كثر من هادي، الله يخلي لينا لامبة وخلاص، مضوية البلاد، وحامية حقوق المثليين فالمغرب.
ملي خرج الكاوري، صرح بلي أن سجون المغرب بحال شي معتقل نازي، وطبعا الأمر دار ضجة، وتناقلته وسائل الإعلام، وكاين لي ستغرب من التصريح، بحال الى كان كايتخايل أن حباسات المغرب أوطيلات، راه فمئة حلقة أظهر سقيريط حقيقة وضع السجون فالمغرب، وكاين كفس و أفظع من دوك جوج حباسات لي دوزت، ولكن حيث أغلبنا المتواجدين تم كنا من سكان ما وراء الشمس، راه بنادم كيدخل كيلقى اللوبية ولعدس فابور كيقول والله الى كنت مشموت مجيتش للحبس من شحال هادي، ولكن بالنسبة لإنجليزي كبر فالحرية و احترام حقوق الإنسان وكبر فدولة كتحتارم انسانيتو وكرامتو، راه جاه الحبس فالمغرب كمعتقل نازي، أما حنا لي كابرين فالحبس لكبير راه كايجينا الحبس الصغير أوطيل وصافي.

موضوعات أخرى

28/03/2024 14:45

بوليس سيدي قاسم شدو 4 فيهم واحد قاصر بانو ف فيديو هازين السيوفا وكيسبو فمؤسسات وموظفين عموميين وكيحرضو على تنفيذ اعتداءات

28/03/2024 14:28

واش الحكومة غاتحل الحمامات مور الشتا لي طاحت.. بايتاس لـ”گود”: على حسب كل إقليم والوضعية ديال الماء فبلادنا صعيبة ونسبة الماء لي دخلات للسدود ضعيفة

28/03/2024 14:22

تعيينات جديدة فمناصب عليا دازت اليوم فمجلس الحكومة: منهم مدير المحروقات ومدير الموارد البشرية فوزارة الخارجية

28/03/2024 14:00

“الهاكا” مسؤولة على فضيحة “مومو” مع “هيت راديو”. كيفاش تعطلات تخرج قرار فاكثر منشط عاقباتو

28/03/2024 13:30

وزير النقل للساقطين فامتحان البيرمي: غانعطيوهم فرصة جديدة ومغاديش يتحسب امتحان الاثنين والهدف من الأسئلة الجديدة هو نقصو من الكسايد

28/03/2024 12:45

ليلة “العشاء الأخير” فحزب الاستقلال: هادي 3 قضايا كبرى غادية تشعل حروب ف “الميزان” قبل وبعد المؤتمر